Shkodër, përurohet qëndra muzeale “Ndre Mjeda”

:::ShkoderZemer Balkanweb - SHKODËR- Në fshatin Kukel të komunës Bushat, atje ku Ndre Mjeda jetoi dhe i shërbeu për shumë vite komunitetit si famullitar, është përuruar sot shtatorja si dhe qëndra muzeale në kujtim të poetit. Nderimi për Mjedën erdhi në kuadër të aktiviteteve të organizuara me rastin e 75 vjetorit të vdekjes së tij. Të pranishëm në ceremoninë e përurimit të shtatores ishin përfaqësues të pushtetit vendor të qarkut Shkodër, profesorë dhe


akademikë nga Kosova, Maqedonia dhe Mali i Zi, deputetë të Parlamentit Shqiptar, nga Arqipeshkvia e Dioqezës Shkodër- Pult, etj.

Gjatë përshëndetjes së tij, Dom Nik Ukgjini, famullitar i fshatit Kukël, pasardhësi i Ndre Mjedës në këtë tempull fetar, vlerësoi së tepërmi të gjithë bashkëpunëtorët që kontribuan në ngritjen e qendrës muzeale, që përmban Kishën shekullore si dhe godinën dhe famullinë ku jetoi poeti Ndre Mjeda.

Qëndra Muzeale do të jetë një vend pelegrinazhi kulturor mbarëkombëtar dhe do të luajë rolin e një vatre të studimeve mjedologjike për brezat e rinjë. “Objekti i përuruar duhet të trajtohet si i veçantë, sepse ruan një kujtese 100 vjeçare e Mjedes në fushën e poezisë, gjuhës, letërsisë, diplomacisë dhe shumë fushave të tjera me të cilën është marrë Ndre Mjeda”, tha Dom Nik Ukgjini, pasardhësi i Ndre Mjedës në fshatin Kukël.

Shtatorja e Ndre Mjedës është punuar nga skulptori Sadik Spahija. Sipas tij, ajo e sjell Mjedën po aq madhështor sa ka qenë edhe në vitet e aktivitetit të tij. Ai bëri të ditur gjithashtu që së shpejti pritet të restaurohet shtëpia muze, e cila si e tillë ka funksionuar në kohën e monizmit gjatë viteve 1963-1990. Në të do të sistemohen sendet personale të Mjedës, si materiale fotografike, shkrime studimore, botime librash, tryeza 100 vjeçare etj.

(d.b/BalkanWeb)


Vazhdo Leximin...

Komenti 0