Gazetari sportiv, Ymer Striniqi merr titullin “Nderi i Qytetit”

:::ShkoderZemer ( 18/06/08) SHKODËR - Në 65-vjetorin e lindjes nderohet gazetari i mirënjohur sportiv, Ymer Striniqi. Këshilli Bashkiak i Shkodrës në mbledhjen e tij të fundit i ka dhënë titullin “Mirënjohja e Qytetit”, për kontributin e shquar të dhënë për 45 vite me radhë nën fushën e gazetarisë sportive, kontribut të cilin vazhdon ta japë edhe sot.

Striniqi është pasues i denjë i legjendës së mikrofonit të gazetarisë sportive, Anton Mazreku. Në ambientetet e Hotel “Rozafës”, shoqata publicistike “Anton Maz-reku” dhe stafi i gazetës “Vllaznimi Sportiv” kanë organizuar dje ceremoninë e dorëzimit të titullit për profesor Ymerin, siç e thërrasin në Shkodër të gjithë. Ceremonia është bërë paraditen e së martës, pikërisht në ditën e 65-vjetorit të lindjes së tij. Të pranishëm ishin drejtuesit më të lartë vendorë. Ymer Striniqi është gazetari më i vjetër sportiv në Shkodër, i cili vazhdon të jetë edhe sot aktiv në profesionin e tij. Ai ka plot 45 vite punë në radio, televizione dhe gazeta, duke u bërë kështu figura me e njohur e gazetarisë sportive në rajonin verior. Ka qenë përkushtimi i tij për dekada ndaj sportit të Shkodrës, gazetaria profesioniste, të cilën e ka ushtruar me pasion, korrektesa në pasqyrimin e ngjarjeve sportive, që e bënë të nderohej unanimisht duke marrë të gjitha votat e anëtarëve të Këshillit Bashkiak. Ymer Striniqi ka mbaruar studimet për Gjuhë-Letërsi dhe ka punuar për vite të tëra si mësues.


Vazhdo Leximin...

Komenti 1